সময়

(১)

২০১০ চন । তেতিয়া মই ইউনিভাৰচিটি এখনত পি.এইচ.ডি কৰি আছো । মোৰ নেট-জে.আৰ এফ আছিল । ইউ.জি.চি ফেলোশ্বিপ । এমাহ-দুমাহ........ চাৰিমাহ পাৰ হৈ গল । ফেলোশ্বিপৰ পইচা নাহেহে নাহে । পেটত গাঠি মাৰি তো ৰিচাৰ্চ কৰিব নোৱাৰি । গতিকে টিউচন কেইটামান কৰো । লগত জইন কৰা বাকীকেইটাৰো একে অৱস্থা ।
এদিন ইউনিভাৰচিটিৰ ডিপাৰ্টমেন্টৰ হেডৰ ওচৰলৈ গলো

- ছাৰ, চাৰিমাহ হলহি, ফেলোশ্বিপ অহাই নাই....... মই কলো
- হয় নেকি, তোমাৰটো চাৰিমাহ হৈছেহে, বছৰ বছৰ ধৰি ইউ.জি.চিৰ পইচা পেন্ডিং হৈ থাকে........... হেডে কলে
- মানে ছাৰ আপোনাৰ লেভেলত অলপ লিখালেখি কৰিলে অলপ সোনকাল আহেই কিজানি
- তোমালোকৰ ফেলোশ্বিপ,তোমালোকে ইউ.জি.চিত খবৰ কৰা , মই মাজত সোমাই কি কৰিম
- তথাপিও লেটাৰ এখন
- মই নোৱাৰো এইবোৰ কৰিব, তোমালোকে ট্ৰেজাৰাৰক ধৰা, ভি.চিক ধৰা
- ঠিক আছে ছাৰ, ফেলোশ্বিপ নহা কেইদিন ইউনিভাৰচিটিৰ ফালৰপৰা, লাম্প-চাম ৪-৫ কৈ দিলে অলপ সকাহ পালোহেতেন , এতিয়া চলাত অলপ প্ৰবলেম হৈছে
- চোৱা তোমাৰ প্ৰবলেম, মই কেনেকৈ চল্ভ কৰিম, ভি.চিক ধৰাগৈ

তেওৰ ৰুমৰপৰা সিদিনা মই ওলাই আহিলো

(২)

২০১১ চন । টিউচন কৰি চলি থাকিলো । এটা সময়ত লাকে ফেভাৰ কৰিলে । ভাগ্য আৰু পৰিশ্ৰমৰ সমন্বয়ত অ.এন.জি.চিত চাকৰি পাই গলো । ফেলোশ্বিপৰ পইচা তেতিয়াও আহি পোৱা নাই ।
কেইমাহমান পাছত লগৰ এটাই খবৰ দিলে, ইউ.জি.চিৰ পইচা আহিছে ।
দুদিনৰ ছুটী লৈ ৰাতিপুৱাই ইউনিভাৰচিটিলৈ গলো । ফেলোশ্বিপৰ বিল চাবমিট কৰিব লাগে । বিল ফৰ্ম এখন লৈ ফিল আপ কৰিলো । গাইডে চাইন কৰিলে । এতিয়া ডিপাৰ্টমেন্টৰ হেডৰ চাইন হলেই বিলখন চাবমিট কৰি আজৰি হব পাৰো ।
হেডৰ ৰুমলৈ সোমাই গলো
- ছাৰ , মোৰ ফেলোশ্বিপৰ বিল এখন আছিল, গাইডে চাইন কৰিলে, আপোনাৰ কাউন্টাৰ চাইন লাগে
- তোমাকতো ইয়াত দেখা মনত পৰা নাই
- যোৱাবছৰ মই পি.এই.চ ডি ৰিজাইন দিছো, এতিয়াহে পইচা আহিছে, বকেয়া পইচা নিব আহিছো
হেডে বিলখন চালে, তাৰ পাছত কলে
- তুমিযে পইচা পাবা তাৰ প্ৰুফ কি
- ছাৰ, মোৰ জইনিং লেটাৰ, ৰেজিগনেচন লেটাৰ , এন.অ.চি গাঠি দিছো, গাইডে চেক কৰি চাইন কৰিছে, আপোনাৰ চাইনটো বাকী আছে......... মই কলো
- এনেকে নহব, মান্থৱাইজ ষ্টেটমেন্ট লাগিব
-ছাৰ মই অফিচত খবৰ কৰি আহিছো, তেওলোকৰ ওচৰত চব ৰেকৰ্ড আছে, এইখিনি চাবমিট কৰিলেই হৈ যাব বুলি কৈছে
- মান্থলি ষ্টেটমেন্ট লাগিব , নহলে মোৰ চাইন নহব

তেওঁৰ ৰুমৰপৰা ওলাই আহিলো

(৩)

লগৰ দুটামানক ফোন কৰিলো । সিহতে সিহতৰ ডিপাৰ্টমেন্টত মান্থলি ষ্টেটমেন্ট দিব লগা হোৱা নাই । এটাই আইডিয়া দিলে......... মান্থকেইটা ব্ৰেক আপ কৰি চাৰ্ট এখন বনাই দে ।
এ-ফৰ চাইজৰ পেপাৰ এখনত হাতেৰেই চাৰ্ট এখন বনালো । সেইবোৰ কৰোতে ১২ টা বাজিল । লান্স টাইম । হেড কৰবালৈ ওলাই গল । হেডৰ ৰুমৰ বাহিৰৰ চকীখনত বহি অপেক্ষা কৰিলো । ১ টা বজাত হেড আহিল । মই সোমাই গলো ।
- এতিয়া নহয়, মই অলপ বিজি আছো, বাহিৰত ৱেইট কৰা...... হেডে কলে

বাহিৰৰ বেঞ্চখনত মই অপেক্ষা কৰিলো ।
সেই অপেক্ষাৰ কাল আছিল ১৮০ মিনিট । সেই ১৮০ মিনিটত ক্ষোভ , হতাশা আৰু এটা খঙে মোক আগুৰি ধৰিলে ।
আবেলি ৪ টা বজাত পিয়নজনে কলে......... ছাৰে আপোনাক মাতিছে

ইচ্ছাৰ বিপৰীতে পকেটৰপৰা অ.এন.জি.চি ৰ আইডেনটিটি কাৰ্ডখন উলিয়াই ডিঙিত ওলোমাই ললো ।
হেডৰ ৰুমত সোমালো । বিল ফৰ্মখন আগবঢ়াই দিলো । ডিঙিৰ আই-কাৰ্ডখন জিলিকি উঠিল ।

- তুমি অ.এন.জি.চিত সোমালা নেকি....... হেডে সুঘিলে
- হয় । ফেলোশ্বিপৰ পইচা পাতি নাই , কেনেকে চলিম । সেয়ে পি.এইচ.ডি বাদ দিলো, অ.এন.জি.চিৰ পৰীক্ষা দিলো । পাই গলো ।
- আচ্ছা , নৱজিত হত সোমাইছিল যে, তেতিয়া নেকি
- নহয় । তেওলোক টেকনিকেল এচিষ্টেন্ট পোষ্টত সোমাইছিল । মই নেচনেল লেভেলত গ্ৰেজুৱেট ট্ৰেইনী এক্সাম দি সোমাইছো । বৰ্তমান মই অ.এন.জি.চিৰ প্ৰথম শ্ৰেনীৰ বিষয়া ।
- দৰমহা পাতি ভালেই ছাগে
- হয় । ইউ.জি.চি ফেলোশ্বিপত ছমাহত মই যিমান পইচা পাম, এতিয়া এমাহতে তাতকৈ বেছি দৰমহা পাও, অন্যান্য সা-সুবিধাবোৰতো আছেই ।
হেডে বিল ফৰ্মখনত চাইন কৰিলে ।
- বহা অলপ সময় । চাহ একাপ খাই যাবা ............. হেডে কলে
- নাই ছাৰ , চাৰিটা বাজিল, বিলখন জলদি অফিছত জমা কৰিব লাগে, ৰাতিলৈ নাইট চুপাৰ আছে..... মই কলো
- আচ্ছা, এতিয়াতো ডাঙৰ অফিছৰ হলা, ইউনিভাৰচিটিৰ লগত টাচ ৰাখিবা , তোমালোক আমাৰেই এলুমিনি দিয়াচোন ।
- নিশ্চয়
- তোমাৰ এড্ৰেছ আৰু কন্টেক নং দি যাবাছোন

কাগজ এখনত নাম, ফোন নং আৰু এড্ৰেছ লিখি হেডৰ ৰুমৰপৰা ওলাই আহিলো । অফিছত গৈ বিল ফৰ্মখন জমা কৰিলো । অফিছৰ কেৰানীজনে মান্থলি ষ্টেটমেন্টৰ প্ৰয়োজন নাই বুলি কৈ সেইখন মোক ওভোটাই দিলে ।

(৪)

৪ জুন ২০১৪ । শ্বিফট গাড়ীৰে চাইটলৈ গৈ আছো । আননউন নাম্বাৰ এটাৰপৰা ফোন আহিল ।
- হেলো, বিকাশ নেকি
- হয়
- মই ইউনিভাৰচিটিৰ কে.কে.এছ ছাৰে কৈছো
- কওকচোন
- আচ্ছা ২২ তাৰিখে অ.এন.জি.চিৰ এক্সাম এটা হব যে
- হয়, গ্ৰেজুৱেট ট্ৰেইনী এক্সাম
- তাত মেকানিকেল ইঞ্জিনিয়াৰ লয় ন
- হয়
- পৰীক্ষাটো নাজিৰাৰপৰা চলায় নেকি
-নহয় । এইটো নেচনেল লেভেলৰ এক্সাম । ডেৰাডুনৰ মেইন অফিচৰপৰা কন্ট্ৰল হয় ।
- আচ্ছা তোমাৰ বাৰু কোনোবা ডাঙৰ অফিচাৰ, জি.এম, ডিজি.এম বা তেনেকুৱা লিংক আছে নেকি । মানে অলপ কৈ দিলে চাকৰি হৈ যোৱা বিধৰ ।
- তেনেকুৱাতো চিনাকি নাই
- অলপ খবৰ চবৰ কৰি মোক জনাবাচোন, মোৰ ঘৰৰেই কেন্ডিডেট এজন আছে, যি খৰচ পাতি হয় কৰি দিম ।
তেওৰ সৈতে কথা পাতি থকা সময়খিনিত মোৰ তেওৰ অফিচৰ বাহিৰত অবাবত অপেক্ষা কৰা ১৮০ মিনিটলৈ মনত পৰিছিল ।
মানুহৰ সময় সচাকৈয়ে সলনি হয় । টাইম ইজ দা গ্ৰেটেষ্ট লেভেলাৰ ।
- ঠিক আছে ছাৰ । আপুনি চিন্তা নকৰিব । মই বাৰু তেনেকুৱা লিংক-চিংক থকা মানুহৰ খবৰ লৈ আপোনাক জনাই দিম ........... মই কলো

মই ফোনটো কাটি দিলো । এটা সময়ত মই তেওৰ অফিছৰ বাহিৰত ঘন্টাৰ পাছত ঘন্টাজুৰি অপেক্ষা কৰাৰদৰে এতিয়াৰপৰা তেও মোৰ ফোনৰবাবে অধীৰবাবে অপেক্ষা কৰিব ।


বি.দ্ৰ-
অহা ২২ জুন তাৰিখে অ.এন.জি.চিৰ বিষয়া পদৰ বাবে লিখিত পৰীক্ষা হব । লিখিত পৰীক্ষাত উৰ্তীৰ্নৰ বাবে বিষয়ভেদে ৬০-৭৩ শতাংশ কাট অফ হয়গৈ । বৰ্তমানৰ ফৰ্মেটত ৪০ শতাংশ লিখিত পৰীক্ষা , ৪০ শতাংশ একাডেমিক কোৱালিফিকেচন , ১০ শতাংশ চাইকমেট্ৰি আৰু ১০ শতাংশ পাৰ্চনেল ইন্টাৰভিউৰ নম্বৰ যোগকৰি ফাইনেল চিলেকচন ৰিজাল্ট দিয়া হয় ।
লিখিত পৰীক্ষা ভাল নহলে কোনেও চাকৰি পাব নোৱাৰে ।
(গতিকে লিংক বিচাৰি নিজৰ লগতে মোৰ দৰে মানুহৰ সময় নষ্ট কৰাতকৈ ভালকৈ পঢ়া-শুনা কৰি বিষয়বস্তৰ সম্যক জ্ঞান লৈ সৰ্বভাৰতীয় পৰ্যায়ৰ এই প্ৰতিযোগিতামুলক পৰীক্ষাটোত অৱৰ্তীৰ্ন হোৱাৰহে প্ৰয়োজন )