চন্দনদা

চন্দনদাক HRএ ৰ লটি-ঘটি কৰি আছে । চন্দনদাই পাছপৰ্টৰ এন.অ.চিৰ কাৰনে এপ্লাই কৰিছিল । এমাহ পাৰ হল, একো খা-খবৰেই নাই । ডেৰমাহ পাছত HRএ ফোন কৰি কলে যে চন্দনদাৰ আই কাৰ্ডৰ জেৰক্স দিব লাগিব ।

সেই সময়ত চন্দনদা আছিল অফ পিৰিয়ডত গুৱাহাটীত ।
- বাইদেউ, মেইল পঠিয়ালে নহব নেকি
- মেইল-চেইল মই নাজানো, জেৰক্স কপি লাগিব...... HR বাইদেৱে কলে

চন্দনদা ৰাতিৰ বাছত উঠি শিৱসাগৰ পালেগৈ । ইফাল সিফাল কৰি HR বাইদেউৰ অফিছ পালেগৈ । অফিছ পাই চন্দনদাৰ টেমা গৰম হৈ গল । বাইদেউ নাই । শিৱৰাত্ৰিৰ এক্সটেনডেড ছুটী । চন্দনদাই বাইদেউক ফোন কৰিলে আৰু তেওৰ কথামতে আই-কাৰ্ডৰ জেৰক্স টেবুলত থৈ আহিল ।

চন্দনদা পাছদিনা ৰাতিপুৱা গুৱাহাটীৰ বাছত উঠিল । বাছ আহি জাগীৰোড পাইছে মাত্ৰ । HR বাইদেৱে ফোন কৰিলে ।
- এস চন্দন , তুমিচোন ফটো দিয়াই নাই
- বাইদেউ, ফটোও দিব লাগে নেকি
- অতো
- বাইদেউ, আপুনিতো কব লাগে আগতে, মই ঘুৰি গুৱাহাটী পালোৱেই
- তুমিতো জানিব লাগে, ইমান মানুহে কৰি আছে, সিহতক সুধিলেই হয়

চন্দনদাই আকু তৰ্ক নকৰিলে । যোৰাবাটৰ অকোৱা পকোৱাখিনিত চন্দনদাৰ মুৰটোও খঙত অকোৱা পকোৱাকৈ ঘুৰিব ধৰিলে ।

অফ শেষ হৈ অন পিৰিয়ড আৰম্ভ হল । চন্দনদা ডি.এছ.এ গেলেকী পালেহি । দুদিনৰ ভিতৰতে ডি.এছ.এৰ আধা মানুহে গম পাই গল যে চন্দনদাক HR এ হাৰাশাস্তি কৰি আছে ।

অ.এন.জি.চিত চন্দনদা মোৰ গুৰু, আৰু চন্দনদাক কোনোবাই হাৰাশাস্তি কৰিব কোনোপধ্যে মানি লব নোৱাৰি ।

- বলক চন্দনদা, অফিছ যাও , চাল্লা ফিল্ডৰ মানুহক দৌৰাই থাকে, ফালি থৈ আহিম...... মই কলো
- হা চন্দনজী , একদম ঠোক দেনা চাহিয়ে..... অমিত গ্ৰোভাৰে যোগ দিলে
- চন্দনদা, একেবাৰে দি দিব লাগে পুৰা..... দীৰুদাৰ চেহেৰাতো যুদ্ধংদেহি এক্সপ্ৰেচন আহি গল

পাছদিনা শ্যামলদাৰ বাইকত দুয়োজন অফিছ পালোগৈ ।
- চন্দনদা, আজি যদি কিবা তেৰি-মেৰি কৰে, একেবাৰে জি.এম ৰ ওচৰত গৈ ফালি থৈ আহিম....... মই কলো
- ঠিক আছে, প্ৰথমতে প্যাৰ-মুহাবতৰে চাও, নহলে আজি পুৰা মুডত আহিছো...... চন্দনদাই ৰিপ্লাই দিলে

প্ৰথমতে চন্দনদাই চাৰফেচ টীমৰ অফিছত সোমাই বাইদেউৰ বিষয়ে অলপ ইনফৰমেচন কালেক্ট কৰি ললে । তাৰপাছত বাইদেউৰ অফিছ পালেগৈ ।

- বাইদেউ ........ চন্দনদাই মিহি মাতেৰে কলে
বাইদেৱে মুৰ তুলি চালে , চকুৰ চাৱনিৰে বাইদেৱে সুধিলে..... কি লাগে
- মানে মই চন্দন
- কোন চন্দন
- মানে এন.অ.চিৰ কাৰনে ফটো দিবলৈ থাকি গৈছিল যে
- অ , তোমালোকৰ ইমান বছৰ চাকৰি হল, একোৱেই নাজানা, এবাৰতে চব দিব লাগে, আমাক ইমান দিগদাৰি দি থাকা..... HR বাইদেৱে ৰঙা চকু দেখুৱাই কলে

মোৰ টেমা গৰম উঠি গল । আৰে কি কি বস্ত লাগিব সেয়া HR এ বেছি ভালকৈ জানিব । মেনুৱেলত কতো স্পষ্টকৈ লিখা নাই, HR এ নিজৰ খেয়াল খুচিমতে কাগজ বিচাৰে, এবাৰতে কৈয়ো নিদিয়ে , দহবাৰ ঘুৰাই দহখন কাগজ বিচাৰে ।
চন্দনদা কিন্ত কুল হৈ থাকিল । সেমেনা-সেমেনিকৈ চন্দনদাই কলে
- কি কৰিব বাইদেউ, মোৰেই ভুল, আপোনাক দিগদাৰ দিছো যদি সৰু ভাইটি বুলি মাফ কৰি দিব আৰু
- ও
- আৰু বাইদেউ আপুনি আছে কাৰনেই আমি ৰ কামবোৰত একো চিন্তা নকৰো । আপোনাৰ কাম যে ভাল সেইটো চবেই জানে , গতিকে ইমান টেনচন নলও আৰু , আপুনি আছে যেতিয়া কিবা মিলাই মেলি ঠিক কৰি তো দিয়েই
- ও ............. বাইদেউৰ চেহেৰাত সন্টুষ্টিৰ হাহি এটা দেখা গল
- আৰু বাইদেউ আপোনাক যেতিয়াই দেখো অনবৰত কামত ব্যস্তই দেখা পাও
- এহ নকবা, বহুত কামৰ প্ৰেচাৰ
- এস বাইদেউ এই নতুনবোৰক কামত খটুওৱাক আকৌ , এতিয়াতো আপুনি অলপ আৰাম কৰাৰ দিন........ চন্দনদাই কলে

চন্দনদাই বাইদেউৰ পিন্ধি থকা ড্ৰেছযোৰ তাৰিফ কৰিলে । বাইদেউৰ লৰা-ছোৱালীহাল বাংগালুৰুৰ কেডি. কলেজত পঢ়ি আছে, গতিকে চন্দনদাই ইমান টেলেন্টড লৰা-ছোৱালীৰ অভিভাৱক যে কিমান ভাগ্যবান আৰু ইমান ভাগ্যবান অভিভাৱক পাই লৰা-ছোৱালী তাতকৈও বেছি ভাগ্যবান , লগতে কেডি কলেজ যে এখন অতি ভাল কলেজ আৰু তাৰ ষ্টুডেন্টবোৰ বহুত ভাল সেইটো কথাও কলে । মই মুৰ দুপিয়াই, হয় হয় কৰি চন্দনদাক চাপৰ্ট দিলো ।

মানে কথাটো হল, আধাঘন্টাৰ ভিতৰত বাইদেৱে হাহিমুখে চন্দনদাই বিচৰামতে এন.অ.চি উলিয়াই দিলে ।

- দেখিলা এই ককায়েৰাক, ডেৰমাহ টৰ্চাৰ খাই মোৰ ইমান খং উঠি আছিল, মানুহগৰাকীয়ে গম পালে নেকি..... চন্দনদাই সুধিলে
- না .......... মই কলে
- এই ককায়েৰাৰপৰা তোমাৰ শিকিবলগীয়া বহুত আছে
- মানে চন্দনদা , মানে মোৰ ফাইল এটাও ফচি আছিল, কত আছে লকেট কৰি পৰা নাই , নেওগদাক দিছিলো, নেওগদাই ইয়াত দিয়া বুলি কলে, এতিয়া ইয়াতো নাই তাতো নাই..... মই কলো
- হয় নেকি, ন প্ৰবলেম , বলা

দুয়োটা পুনৰ বাইদেউৰ ওচৰ পালোগৈ ।

- মানে বাইদেউ, একেবাৰে সৰু কথা এটা আছিল, এই লৰাকণৰ ফাইল এটা আছিল, আপোনাৰ ওচৰত কেনেবাকে আছে নেকি চাই দিব নেকি...... চন্দনদাই মোক দেখুৱাই কলে

লৰাকণ ! চন্দনদাই মোক একেবাৰে পেন্দুকণা বাচ্চা টাইপ বনাই দিলে । যিয়েই নহওক, কিমান দৌৰাদৌৰি কৰিম আৰু । ফাইলটো উলিওৱাৰ খাতিৰত ময়ো লৰাকণৰ নিচিনাকৈ থিয় দি থাকিলো ।