ডে বিফৰ টুমৰু

আচলতে মই এটা কুল মানুহ l বেলেগে যিয়েই নাভাবক মই নিজকে কুল বুলি ভাবো l

আৰে এয়া কি, মোৰ হাতত দুটা বেগ দেখোন, আৰু মই দেখোন শ্বপিং মলত, মোৰ আগে আগে এজনী মহিলা, মহিলাই মোক ডেবিট কাৰ্ডখন খুজিছে, আৰু মই দি দিছো....... কি হৈছে মোৰ, বেংক বেলেন্সৰ চত্যানাচ হোৱাৰ পাচতো মই দেখোন স্মাইল হে কৰি আছো !
মহিলাগৰাকীয়ে কলে....... বলা এতিয়া
বেগ দুটা দাঙি গাড়ীত উঠিলো...... চিধা কোৱাটাৰলৈ
কোৱাটাৰত সোমাই আচৰিত হৈ গলো... পুৰা হোলিয়া হী বদলি হৈ গল দেখোন
যোৱাবছৰ গ্ৰীণ কালাৰ কৰিছিলোহে, কোৱাটাৰটো দেখোন, ৰঙা, কমলা, বেঙুনীয়া ৰঙৰ ভেৰাইটিজ হৈ গৈছে l আৰু বাওফালৰ ৱালখনত চে গুৱেভাৰাৰ ফুল চাইজদ পষ্টাৰখন ......কত

চে গুৱেভাৰা কত বুলি সুধিছিলোহে, মহিলাগৰাকী ভেকাহি মাৰি উঠিল l
মোক আচৰিত কৰি ভেকাহিৰ উত্তৰত মই মৌন হৈ থাকিলো l

কি খাবা আজি...... মহিলাগৰাকীয়ে সুধিলে
- চিকেন আকৌ, মই চিকেন খাই ভাল পাও বুলি জানাই দেখোন....... মই কলো

কামৱালী বাইৰ হতুৱাই মহিলাগৰাকীয়ে মোৰ বাবে দুখন শুকান ৰুটি আৰু একাপ নিমখ-চেনী একো নিদিয়া ৰঙা চাহ বনোৱালে
- তোমাৰ পেটটো ওলাই গৈছে, মিচেচ চলিহাই মিচেচ গোহাইৰ আগত সিদিনা মিচেচ বৰুৱাৰ এনিভাৰচিৰি পাৰ্টিত কৈছিল, মই কিমান লাজ পাইছো জানা, এয়াই খাব লাগিব........ মহিলাগৰাকীয়ে মোক উদ্দেশ্য কৰি কলে

মই মোৰ পেটৰ পিনে চালো...... কতা, পেট চোন নাইয়েই
আৰু ......মই দেখোন ৰুটি চোবাই আছো.....মা কচম......... কি হৈ গল মোৰ

এদিন দীৰুদাই মোক আচাৰ আৰু পদিনাৰ চাটনিৰে জুতি লগাই নিৰামিষ ভাত খুৱাম বুলি কৈছিল...... মই কৈছিলো, সিংহই কেতিয়াবা ঘাহ-বন খোৱা দেখিছে নেকি, মোৰ ডায়লগ শুনি দীৰুদাই মাটন কাৰী বনাইছিল l সেইদিন আৰু আজি এই দিন !

মা কচম, কি হৈ গল, কেনেকে.......... ভাবি আছো

একদম ৱেল ডেকৰেটেড ৰুম, ৰুম ফ্ৰেচনাৰেৰে আমোলমোলাই আছে, মই দেখোন এতিয়া বিউটি পাৰ্লাৰ এখনত আছো.....
- ইয়াক চম্ভালিবা, মই মেনিকিউৰ, পেডিকিউৰ, থ্ৰেডিং চব কৰাই লও, কাইলৈ মিচেচ কলিতাৰ পাৰ্টি আছে নহয় ......... এইবুলি কৈ মহিলাগৰাকী পাৰ্লাৰলৈ সোমাই গল

ইয়াক মানে...আব্বে.... মোৰ হাতত... এটা বাচ্চা দেখোন !.. কি কেচ !.. কাৰ কেচ !
বাচ্চাটোক নচুৱাই আছো... পে.পে.পে.. বাচ্চাটোৱে কান্দিবলৈ ষ্টাৰ্ট কৰিছে, কি কৰো এতিয়া

- বটলৰপৰা গাখীৰ খুৱাই দে....... বাওফালৰপৰা কোনোবাই কলে

চিনাকি মাত দেখোন....... বাওফালে চালো, আব্বে চাল্লা, দীৰুদা দেখোন, দীৰুদাই এজ ইউজুৱেল স্মাইল কৰি আছে, কিন্ত সেই স্মাইলটো খোলা নহয়...... দীৰুদাৰ কোলাতো... মা কচম..... এটা বাচ্চা ! এটা ফুল চাইজড বাচ্চা !!

- কি হল দীৰুদা, এনেকুৱা কেনেকুৱা....... মই সুধিলো
- কি কৰিবি দোস্ত, ৰিলেটিভছবোৰে ফচাই দিলে, চাদী কা লাড্ডু..... দীৰুদাই হতাশ চাৱনিৰে কলে

মা কচম..... কি দুনীয়া কি হৈ গল, কত চিবচাগৰত এইচ কৰি আছিলো, দুদিনৰ মুৰে মুৰে হলত ফিলিম, আউটিং, ট্ৰেভেলিং... আৰু এতিয়া... বাচ্চা আৰু.........

পে.পেএপেএ.....বাচ্চাটোৱে কান্দিছে...... টি.টিংটি.টিং.লা.লা....... আব্বে ফোনটোও এইসময়তহে বাজিব লাগেনে...... ফোন ধৰো নো বাচ্চাক গাখীৰ খুৱাও....... গাখীৰৰ বটলটো কেচুৱাটোৰ মুখত লগোৱাৰ চেষ্টা কৰিলো...... ধেই ....বটলটো পৰি গল.......পে.পে.পে. ...টি.টিংটি.টিং.লা.লা.......পে.পে.পে.
বাচ্চাই কান্দি আছে..... ফোন বাজি আছে... বাচ্চাই কান্দি আছে.........পেএএএএএএএএএএ

মা কচম, এই জালিম দুনিয়াত মই থাকিব নিবিচাৰে..... ইমান জেং, ইমান টেনচন !
মা কচম, নট কুল... একদম কুল নহয়, হে ভগ্গু গিভ মি এ ব্ৰেক
একেজাপে বিচনাৰপৰা জপিয়াই দি উচেইন বল্টৰ দৰে পজিচন ললো, যিমান সোনকালে পাৰি পলাব লাগিব .....

চে গুৱেভাৰাক দেখি বল্টৰ ৰাণিং হল্ট কৰি দিলো, ৰুমটোৰ ৱালৰ ৰং সেউজীয়া, ৱালখনত চে গুৱেভাৰাৰ পষ্টাৰখন ঠিকেই আছে......মা কচম....লেপটপত ডাউনলড এটা দি থৈছিলো....... লেপটপটোও চলি আছে......

উফ ৰক্ষা ! দুনিয়াখন এতিয়াও জালিম হোৱা নাই I খিৰিকিখনেদি ৰাতিপুৱাৰ ৰদ এচমকা সোমাই আহিল l