ভোগালী উইচেচ

- শ্ৰাৱণীৰ বয়ফ্ৰেন্ড আছে নেকি........ পাৰ্থই ফোন কৰি সুধিলে
- কোন শ্ৰাৱণী বে....... মই কলো
- এই যে ইউনিভাৰচিটিত আমাৰ জুনিয়ৰ আছিল, কে.জি.বি ছাৰৰ লেৱৰ
- নাজানো, থাকিবও পাৰে, কিন্ত দোস্ত, ৱ মে নহী হু
- খবৰ লৈ দে না
- কেনেকে লম বে
- আব্বে তোমাৰ জুনিয়ৰবোৰ চিনাকি দেখোন, লৈ দিয়া না
- ৰক্তিমক ফোন কৰ আকৌ, সিতো কেজিবিৰ লেৱৰে
- ৰক্তিম জেং আছে, চবকে কৈ দিব, ইনফৰমেচন এটা লৈ দিব নোৱাৰা, কাম নাই তোৰ, এনেয়ে ফালি থাকা
- জেক নিদিবা, মই সুধি কৈ আছো

পাৰ্থই বিয়াৰ বাবে ছোৱালী চাই আছে, আচলতে যোৱা তিনিবছৰমান হল, চাইয়েই আছে, প্ৰথম প্ৰথম পাৰ্থই ছোৱালী চাব গৈছে বুলি খবৰ পালে তামাম থ্ৰীল ফিল কৰিছিলো, কিন্ত বৰ্তমান এইটো এটা কমন কথা হৈ পৰিছে, এতিয়ালৈ পাৰ্থই চাবলৈ যোৱা ছোৱালীৰ সংখ্যা হাফচেঞ্চুৰী পাৰ কৰিলে, কিন্ত একো হোৱাগৈ নাই

এইবাৰ ছাগে শ্ৰাৱণী নামৰ আমাৰ জুনিয়ৰজনী পাৰ্থৰ ৰাডাৰত আছে, শ্ৰাৱণীক মই জানো, আমাৰ কলেজৰ জুনিয়ৰ, কলেজত থাকোতে জুনিয়ৰকেইটাই নোটছ মোৰপৰাই লৈছিল, তাৰ পাছত ইউনিভাৰচিটিতো মই দীপাংকৰদাৰপৰা লোৱা নোটছবোৰ শ্ৰাৱণীহতক পাছ কৰি দিছিলো, এতিয়া কিবা কামত ইউনিভাৰচিটি গলে শ্ৰাৱণীহতক হাই-হেলো কৰো, মোটামুটি এটা সৌহাৰ্দ্যপুৰ্ণ ৰিলেচন আছে

কিন্ত প্ৰবলেম হল যে শ্ৰাৱণীক কেনেকে সুধিম, মই চিধা চিধি কথা কোৱা মানুহ, চিধাই যদি সুধি দিও বয়ফ্ৰেন্ড আছে নে নাই, জেং হৈ যাব, মিচআন্ডাৰষ্টেন্ডিং হৈ ইমপ্ৰেচন খাৰাব হৈ যাব, বেলেগৰ থ্ৰু সুধিলে...., নাই, তেতিয়া আৰু বেয়া হব, বেটাৰ ফ্ৰী এন্ড ফ্ৰেংক, চিধাই শ্ৰাৱণীক ফোন কৰো, ডাইৰেক্ট টু দা পইন্ট কথা পাতো যে মোৰ বন্ধু এজনে তোমাক পচন্দ কৰে, বন্ধুই চৰকাৰী চাকৰি কৰে, ত্ৰিশমান দৰমহা পায়, যোৰহাটৰ টাউনত নিজৰ ঘৰ আছে , তুমি যদি এংগেজ হৈ থকা নাই মাই ফ্ৰেন্ড উইল ইনিচিয়েট দা প্ৰচেচ, বাচ, হৈ যাব, টু দা পইন্ট
লাইফত বহুত ৰোল প্লে কৰিছো, এইবাৰ ঘটকৰ ৰোল প্লে কৰিবলৈ মেন্টেলি প্ৰিপেয়াৰ হলো

শ্ৰাৱণীলৈ ফোন লগালো
- হেলো, শ্ৰাৱণী নহয় জানো
- আৰে দা , ইম্মান দিনৰ মুৰত মনত পৰিল যে, কি খবৰ আপোনাৰ
- ভাল, তোমাৰ কেনেকুৱা
- ভাল ভাল, পিছে বিয়া কেতিয়া আপোনাৰ, বিয়াত মাত্তিব কিন্তু, ছোৱালী ঠিক হল নে নাই

চাল্লা এইটোৱেই প্ৰবলেম, শ্ৰাৱণীয়ো মোক কামোৰ দিলে, ৰীগ, অফিছ, পাৰ্টি, চচিয়েল গেদাৰিং, ৰিয়ুনিয়ন মীট, চবতে একেটাই কামোৰ, কিন্ত এট দিচ মমেন্ট অবজেকটিভ বেলেগ, পাৰ্থক ইনফৰমেচন দিব লাগে

- মোৰ বাৰু হৈ থাকিব, তোমাৰ কোৱা, বিয়া-বাৰুৰ কথা চলি আছে বোলে ঘৰত.... কনভাৰচেচন ষ্টাৰ্ট কৰিলো
- মোৰ বিয়া, নহয়, কোনে কলে আপোনাক.....শ্ৰাৱণীয়ে আচৰিত হোৱাদি কলে
- মোৰ আৰু ইনফৰমাৰৰ অভাৱনে
- এনেকুৱা একো চলা নাই, আপোনাক কোনে মিছইনফৰমেচন দিছে
- যোৱাবাৰ গুৱাহাটী যাওতে চিনেমাহল এটাৰ সন্মুখত দেখিছিলো তোমাক, কুল ডুড এজনৰ লগত বেয়া হাহি হাহি কথা কৈ আছিলা, কি বয়ফ্ৰেন্ড আছিল নেকি , নাম কি............... মই আন্দাজত ফৰমুটি এটা মাৰি কলো
- চিনেমাহল, কেতিয়া, কত, মই একো বুজা নাই

বহুত এৱে দা পইন্ট কথা হল, চিধা পইন্টত আহিলো, নহলে বেচেৰী কনফিউজ হৈ যাব

- এক্সুৱেলি তোমাক কথা কেইটামান সুধিব লাগে, ডন্ট মিছ আন্ডাৰষ্টেন্দ......মই কলো
- কওকচেন
- মানে মোৰ ফ্ৰেন্ড এটা আছে, হি ৱান্ট টু এপ্ৰোচ য়ু ফৰমেলি, যদি তুমি অলৰেডি এংগেজ হৈ আছা তেতিয়াতো সি এপ্ৰোছ কৰি লাভ নাই, গতিকে আই ৱান্ট টু ন হোৱেডাৰ হি কেন এপ্ৰোচ য়ু অৰ নট
- অকে, আপোনাৰ বন্ধুক এপ্ৰোচ কৰিব কওক......শ্ৰাৱণীয়ে অলপ সময় ভাবি কলে
- মানে তোমাৰ ফালৰপৰা একো প্ৰবলেম নাই তো
- নাই
- ঠিক আছে, মই বাৰু তাক জনাই দিও
- অকে

শ্ৰাৱণীৰ ফোনটো কাটি পাৰ্থৰ নম্বৰ ডায়েল কৰিলো, পাৰ্থক ইনফৰ্ম কৰিলো যে সি আগবাঢ়িব পাৰে, কোনো ইচু নাই, তাক আৰু কলো যে ভাই মোক আৰু ঘটকালি কৰিবলৈ কামোৰ নিদিবি, এইবাৰেই প্ৰথম, এইবাৰেই লাষ্ট, নাই বুলিলেও মোৰ ইমেজ এটা আছে

দিন কেইটামান পাৰ হল, মাঘ বিহুৰ বতৰ, কলিগ কেইজনমানৰ শুভেচ্ছামুলক এচ.এম.এছ আহিছে, বাকী পুৰনা বন্ধু-বান্ধৱ কাৰো এচ.এম.এছ নাই, চব বিজি চিডিউলত ব্যস্ত, কাৰো সময় নাই
পাৰ্থকে ফোন কৰি শ্ৰাৱণী আৰু তাৰ কেচটো কি হল সুধিলো, সি দুখৰে কলে যে শ্ৰাৱণীয়ে বোলে পি.এইচ.ডি শেষ কৰিহে এইবোৰ চিন্তা কৰিব বুলি প্ৰচেচটোৰ লিংক-ওমেনগৰাকীক জনাইছে, গতিকে শ্ৰাৱণী কেঞ্চেল

পাৰ্থৰ ফোনটো ডিচকানেক্ট কৰিছোহে, এচ.এম.এছ এটা আহিল..............
মাটি মাহৰ সোৱাদেৰে, মিঠা আলুৰ মিঠাৰে, বৰা চাউলৰ আঠাৰে, জহা চাউলৰ সুগন্ধৰে জীৱন ভোগালী হৈ পৰাৰ কামনাৰে ভোগালী বিহুৰ ওলগ জনালো !!!! উইথ লাভ এন্ড এফেকচন.....ইণী
চেন্দাৰ নেম........Shravani.jr.univ

জানে-অনজানে কনফিউজন এটা ক্ৰিয়েট হৈ গল নেকি, ময়ো ভাবি ভাবি কনফিউজ হৈ গলো
আৰু এটা কথাই মোৰ কনফিউজন বঢ়াই তুলিলে, মই নোটছ দিয়া জুনিয়ৰ দুজনীৰ শকতজনীৰ নাম শ্ৰাৱনী আছিল নে ক্ষীণজনীৰ নাম আছিল, দুয়োজনীয়েইতো কেজিবি ছাৰৰ লেৱৰ, কনফিউজন