বিহুতলীত কামোৰ

চানমাৰিত বিহু চাবলৈ গৈছো । ঠিক বিহু বুলিব নোৱাৰি, কালচাৰেল প্ৰগ্ৰাম । দীৰুদাক ফোন লগালো ।
- কত আছে, মই পালোৱেই
- অলপ ৰখ, মই গৈ আছো....... দীৰুদাই কলে
এই দীৰুদাটোৰ টাইমৰ কোনো ঠিক নাই । সদায় লেট কৰে । বাইকখন ৰাষ্টাতে থৈ হেলমেটটো হাতত লৈ ফিল্ডলৈ সোমাই গলো । এজনক সুধি গম পালো যে আজি জুবিলী আহিব । অলপ ইফালে সিফালে ঘুৰাঘুৰি কৰি বাদামৱালা এটাৰ ওচৰ পালো । তাৰপৰা দহটকাৰ বাদাম লৈ চোবাবলৈ ধৰিলো ।
- আব্বে ইমান দিনৰ মুৰত, কি খবৰ বে
মাতটোৰ ফালে ঘুৰি চালো । মোৰ টাইপৰ লৰা এটা । থোপৰাটো কত দেখিছিলো মনত পেলাব নোৱাৰিলো । তথাপিও যিহেতু সি মোক মাতিছে চিনাকিয়ে হব ছাগে ।
- মোৰ ভালেই , তোৰ কি খবৰ....... মই সোহাতখন আগবঢ়াই হেন্ডশ্বেক কৰিলো
- বিহু চাব আহিছ নেকি, কাৰ লগত
- চিংগোল মানুহ, অকলেই আহিছো আৰু ....... মই কলো
- তোৰ উন্নতি নহল আৰু, আৰু বাকী কত কি কৰি আছ...... সি সুধিলে
- মই অ.এন.জি.চিত , চাৰি বছৰেই হল, তোৰ কচোন
- মই এল.এন.টিত , মুম্মাইত, হাইৱে প্ৰজেক্ট এটা কৰি আছো, ছুটী নাপায়েই, এইবাৰ যেন-তেন বিহুৰ লগত মিলাই ছুটী মাৰি দিলো......... সি কলে
এতিয়ালৈ মই তাৰ আইডেনটিটি ধৰিব পৰা নাই । আৰু এবাৰ মেমৰিৰ ডাটা চেক্টৰত ৰিফ্ৰেছ মাৰিলো । নাই, তাৰ চেহেৰাটো ধৰিব পৰা নাই । ভাবিলো ফ্ৰেন্ডৰ কথা সুধি দিও । কমন ফ্ৰেন্ডৰপৰা তাক কত লগ পাইছিলো ওলাই পৰিব ।
- আৰু কচোন, লগৰকেইটাৰ কি খবৰ.......... মই সুধিলো
- আব্বে বহুতৰ লগত কন্টেকেই নাই বে, কুলু, নীহাৰ তো মেডিকেল কৰি এতিয়া পিজি কৰি আছে, মাধু বি.বৰুৱাত বটানি পঢ়িছিলে, অলপতে বিয়া হল, বাকী খঞ্জন, ঋষভ সিহততো মোৰ লগত এন.আই.টি পৰা পাছ কৰি বাংগালোৰত চাকৰি কৰি আছে । সীমান্ত বি.চি.পি.এল লৈ আহিল নহয় .... সি কলে
- সেইটো গম পাও........ মই মুৰ দুপিয়ালো
তাৰমানে ই মোৰ লগত কটনত হায়াৰ ছেক্ন্ডাৰীত আছিল , তাৰ পাছত এন.আই.টিত ইঞ্জিনাৰিং কৰি বৰ্তমান এল.এন.টিত । কাৰন সি লোৱা নামকেইটা গোটেইকেইটা মোৰ লগত হায়াৰ ছেকেন্ডাৰী পঢ়িছিল । তাৰ ফেচ কাটিংটো অলপ ভালদৰে চাই অনুমান কৰিলে যে ই ৰাজীব বা নবাংকুৰ হব লাগে , অৱশ্য ইয়াৰ কথা কোৱাৰ ষ্টাইলটো প্ৰণৱৰ লগতো অলপ অলপ মিলে ।
- আৰু এটা কথা বে, আমাৰ লগৰ আৰু এটা অ.এন.জি.চিত আছে বোলে, মোক সীমান্তই কৈছিল.....সি কলে
- কোন.......... মই সুধিলো
- সেই যে কামোৰটো
- কোনটো কামোৰ
- সেই যে সীমান্তৰ লগৰটো, চচমা পিন্ধিছিল, ব্লু চাৰ্ট, কাৰ্লি হেয়াৰ, কি নাম আছিল তাৰ
সীমান্তৰ লগৰ, চচমা, ব্লু চাৰ্ট, কাৰ্লি হেয়াৰ, মনে মনে ভাৱিলে সেইটোতো ময়েই হয় চেন । চকুত লাচিক কৰালো, বছৰৰ লগে লগে মোৰ চুলিও চফা হৈ গল , মানে ইও মই কোন সঠিককৈ ধৰিব পৰা নাই ।
- বিকাচ আছিল নেকি তাৰ নাম.........মই কলো
- হয় হয়, বিকাচ, কি কামোৰ আছিল বে, সিও বোলে অ.এন.জি.চিত, তাক লগ পাৱ নেকি
- সি ইমানো কামোৰ নাছিল নেকি...... মই নিজক বচাবলৈ কলো
- কামোৰ নাছিল, কি কৱ বে, তাৰ চিঙাই দিছিল, আব্বে মানুহ কলেজ যায় এনজয়মেন্টৰ বাবে, ক্লাছ বাংক দিব লাগে, ঘুৰিব লাগে, ফুৰিব লাগে, সেয়াহে এনজয়মেন্ট, সি আকৌ টিচাৰ ক্লাছত নাহিলেও কমনৰুমৰপৰা মাতি লৈ আহে, চাল্লা তাৰ কাৰনে নোহোৱা ক্লাছটোও হৈ যায় , বৈধ্যম কামোৰ দিছিল বে.......... সি কলে
হিউমিলেট হৈ গলো । মোৰ সন্মুখতে মোকেই কামোৰ বুলি কৈ আছে । মই হাহো নাহাহোকে পাতল হাহি এটা মাৰিলো ।
- চা দোস্ত, চবৰে পাৰচেপচন বেলেগ বেলেগ না, ফিজিক্স, কেমেস্ত্ৰী, মেথছ, তোৰ ৰাতিপুৱা প্ৰাইভেট টিউচন, আবেলি স্কলাৰ্চত কচিং, চো তোৰ ধৰ কলেজত ক্লাছ নহলেও একো লচ নাই, কিন্ত যাৰ টিউচন-কচিং নাই তাৰ কাৰনে তো কলেজৰ ক্লাছকেইটাই ভৰষা, ক্লাছ নহলে চিলেবাছ কেনেকৈ কমপ্লিট হব ............ মই নৰম সুৰত কলে
- হলেও কামোৰ পাইছিলো বে
- কি ঠিক, কি নাম আছিল তাৰ, বিকাচ, সি ছাগে তহতোকো বৈধ্যম কামোৰ পাইছিলে , হবও পাৰে না ............ মই কলো
অলপ পাছত তাৰপৰা বিদায় ললো । তাক পাছে নকলো যে মইয়েই বিকাচ নামৰ কামোৰটো হয় ।